防暴與街坊膠著之時，兩名剛買完宵夜的十多歲青年踢著拖走來圍觀，一人在吃燒賣，一人手持膠袋。「記者，點解咁多人出嚟嘅？」燒賣男問了一個看來天真的問題⋯⋯
「應該係武漢肺炎掛，但又關天水圍咩事？」另一人說罷，從袋中拿出碗仔翅吃了一羹，麻油味很香。
我解釋：「如果深圳灣唔封關，可能會有好多人搭B2P……」話頭醒尾的燒賣男打斷我的話：「哇屌，係咼，天瑞、天耀，到時成個天水圍都奶嘢。」談了幾句，我好奇為何他們竟對此全然不知。
「呢排大家都講肺炎、罷工，無人講有咩活動。」燒賣男解釋，曾是港豬的他們不太熱衷於政治，但自六月起開始進化為和理背，跟大隊盡力參與集會及遊行都會。
他們坦言對臨時「吹雞」全然不知，一方面是自身的問題，另一方面是最近文宣太少，種種氣氛令大家提不起勁，特別是他們這些核心外圍的人。
「連登、Facebook又無咩行動Post，又無人貼連儂牆講，就算知有嘢發生，都唔知幾時啦。」碗仔翅男亦抱怨。
細問之下，原來他們都有Telegram，但不常開。「大佬呀，一開啲Group都幾千個未讀，但得十幾條（訊息）係有用，點睇？」
防暴仍站在原地還未有動作，只是不時四圍照射街坊，我著他們注意安全。「既然嚟到就企多陣啦，手足都未走，我食宵夜都唔得呀？」「怕佢咩，反正碗仔翅都唔夠味，差咁啲胡椒……」
已經好香啦，我說。他們你一言我一語，十多歲的中學生本應如此歡樂。嬉鬧間，防暴又向前驅趕。碗仔翅味散去，只剩下一支竹籤在地上。
相關文章：
