「818和理非集會」係好多人眼中算係完美結束：無暴力，無衝擊，無人被捕，無硝煙四起。
呢日可能係全香港最開心嘅一日，不但示威者覺得可以「俾啲掌聲自己」，連政府、警察、藍絲都沾沾自喜，返屋企安心入睡，但仍有部分人保持清醒，徹夜難眠，問：「我地究竟贏左咩？」
唔好再講階段性勝利
對警察而言，無衝擊，舒服；對政府而言，無暴力，正合心之意；對藍絲而言，政府、警察好，佢地就開心。
咁示威者呢？集會無人被捕的確值得高興，但呢個唔係咩「階段性勝利」，唔好忘記政府依然無回應五大訴求，更甚嘅係我地已經有無數手足死傷慘重，幾百人被捕。
輸緊5:0嘅大家，係「818」最多只係守和，係「未輸」，唔係贏左。所以以下幾點大家必需清楚：
1. 818係和理非勇武大團結
唔少人話今次贏民意贏輿論，係國際層面其實無咩影響，因為佢地好清楚香港示威者一直係「雞蛋」；係香港人方面，事實上自6月起經歷咁多風風雨雨，民意已成，只得「我地」、「佢地」、同「中間派」。
我地無法令藍絲轉軚，而中間派多數都係「誰大誰惡誰正確」。簡單咁講，呢至少170萬人嘅聲音係大家嘅基本盤，反映勇武同和理非仲係團結。只要我地堅持不割蓆，同聲同氣，我地就係社會主流，舉旗不定嘅中間派就會靠攏。
2. 是你教我們和平遊行是沒用
和理非思想上要進一步，明白「818」同「69」一樣，政權話比我地知：和平示威係無用，佢地根本唔退讓。所以和理非嘅角色，除左係穩定基本盤嘅後盾，仲賦予勇武出師有名，有更大動力向前。
3. 和理非可以撼動政權
「攬炒巴」亦證明左和理非都好有用：提款、不合作運動、文宣、罷工、癱瘓政府部門機構……大家有好多事可以做，兄弟爬山各自努力。不過係呢啲之前，不割席、不篤灰都係最基本。
政府最大嘅陰謀：分化
下一步唔好比佢停，堅守：「和理非>勇武>和理非>勇武」呢個循環，勇武適時克制，和理非適時幫拖。
網上不時有「中計黨」叫人唔好做呢樣唔好做果樣，唔好激嬲共產黨，其實大家都忽略左，最大嘅中計就是：分化，然後逐一清算。
「8.5大罷工」前後，特區政府同中央嘅口風可以見到，佢地污名化並斥責各種行為破壞公眾秩序，影響經濟，香港就快冧等，係想將「反送中示威者」同「市民大眾」切割；下一步就係分化示威者入面嘅「勇武」同「和理非」。
政府係「818」後嘅回應似乎好廢，但其實好陰毒：「集會期間大致和平，但由於參與者佔用了港島多條主要幹道，路面交通大受影響，對市民造成不便……目前最重要的是要盡快回復社會秩序；當一切平靜之後，政府會與市民展開真誠對話，致力修補撕裂，重建社會和諧。」呢段說話我地可以見到：
1. 政府給予和理非甜頭
政府想同廣大市民講，你地呢班得到政府認證嘅「良好公民」，真係乖到要好似幼稚園咁印個白兔仔落手冊，唔好再支持暴力啦，個個星期都和理非完場，再乖啲「一切平靜」就會施捨你「真誠對話」。
呢個「糖衣毒藥」目的只有一個，想意志唔堅定嘅人同勇武割席。尋晚警方「咁啱得咁橋」比人影到有佢地扮黑衣人，大搖大擺返警處，都係同一道理。
2. 從來都無「真誠對話」
呢啲甜言蜜語呃細路就得，除左反映之前嘅和平示威得到嘅都唔係「真誠對話」，你地唔係會信呢個反口腹舌嘅政權會遵守嘛？
作為示威者，得到政府認同真心覺得羞恥，因為咁代表佢地根本無驚過。作為反對者我地應該逆向思考：佢話好我姐係唔驚，我地就唔做；佢話唔好姐係好驚，我地就做。咁樣唔係搞事，而係政權迫我地。
都係果句：核彈都唔割
縱然「818」仍有人對勇武嘅不滿，但希望大家以當日嘅集氣，真真正正「贏一場」。
如果依政府所言宜家「一切平靜」下來，大家士氣必然受損，下一步必係遭到清算，然後面對政府亂叫價，我地只定零星反抗，到時政府又會以「唔平靜」為藉口暫緩對話。
結果我地只會乜都無，然後唇亡齒寒，被呢個亂扣帽子嘅政權玩弄。所以所以，我地一定要「核彈都唔割」，和理非>勇武>和理非>勇武>和理非>勇武>和理非>勇武……直到真正勝利。
延伸閱讀：
