「818」集會第二日，一個又一個核彈令香港人又返到過去嘅憤怒中：將軍澳連儂牆斬人案三人受傷，《信報》副刊記者危殆；黑警濫用私刑，拘捕醉酒長者後加以凌虐；林鄭仍無回應五大訴求。
同一日嘅三單新聞，正好反映現今呢個「警政黑」三位一體政權，呢個「軍政府」嘅荒謬。
1. 黑警
黑警係示威抗爭期間濫用暴力，棍毆槍擊示威者造成多人受傷，及後大規模濫捕，制造白色恐怖。更甚嘅係佢地不時濫權，拉人後會用暴力酷刑對待：拍打下體、戳肛門、警棍塞嘴、拗手、掌摑、拔腳毛……
2. 黑幫
黑警以外，更多下三流嘅事就外判俾省港旗兵、黑幫流氓、刀手暴徒，亂斬亂打市民，然後當局就側側膊或者不予追究，一係唔拉人，一係就拉唔到人。
3. 港共政權
林鄭同特區政府對於呢啲，「核彈」全部都「不割蓆」力撐，將個波推俾名存實亡嘅監警會。講到818集會，佢仍然唔回應五大訴求，只係話希望社會回復平靜、遠離暴力，並立即建立與民間對話平台對話。
勇武升級？突破心理關口
對於呢個政權嘅種種不滿，新一波民憤即將爆發。眼還眼未果，更再有手足受害，可能會進一步變為血債血償。「勇武」同「和理非」，可能要有心理準備，去突破一個新嘅心理關口。
梁天琦話：「你們或許因而心中充滿憤怒，這乃是人之常情。但我懇請你們不要被仇恨支配自己，在危難中，仍要時刻保持警覺與思考。」相信好多勇武派都會將呢句放係心中，提醒自己唔好衝動，做被仇恨支配嘅怪物，而係要多思考。
可能大家唔不同意勇武，部分行為或者會超出大家底線。但「衝衝子」唔一定係衝動，相信大家都會尊重佢地深思後嘅決定，明白我地敵人係邊個。
呢個就係「兄弟爬山各自努力 」。而能否繼續「不篤灰不割席不指責」，只是事後好言相勸同檢討，將成一大考驗。
當敵人稱讚你時……
尋日都提過，港共政權下一步會拉一派打一派，吹捧「和理非」並打擊勇武。第一個比和理非嘅甜頭，就係所謂嘅「民間對話平台」。
相信大家都唔會中計，有乜好對話姐？五大訴求講左咁耐，柒婆聾左呀？但都要慎防有人扮代表，建大台，幫大家袋住先。林鄭所講「會先接觸曾經提出溝通平台不同運作形式的有心人，聆聽他們意見」，就是想分化同增加矛盾，而唔係化解分歧。
筆者多次重申，作為反對者我地應該逆向思考：佢話好我地就唔做；佢話唔好就要盡做。所以都係果句，既然林鄭同黑警「核彈都唔割」，我地都要「核彈都唔割」全力「攬炒」爭取籌碼。
相關文章：
